धरान उपमहानगरपालिका-८ भोटेपुल चोकबाट सोही ठाउँ बस्ने ३७ वर्षीय बिशाल बिश्चकर्मालाई नियन्त्रित लागूऔषध स्पास्मो प्रोक्सीभन ५ सय ४ क्याप्सुल र अवैध लागूऔषध गाँजा करीब २ सय ग्राम सहित शनिबार बेलुका प्रहरीले पक्राउ गरेको छ । ईलाका प्रहरी कार्यालय धरानबाट खटिएको प्रहरीले शंका लागि जाँच गर्ने क्रममा उक्त लागूऔषध सहित बिकलाई फेला पारी पक्राउ गरेको हो । 
सप्तरी राजबिराज नगरपालिका-४ बाट नियन्त्रित लागूऔषध नाइट्रोभेट ४ सय १७ ट्याबलेट सहित शनिबार ३ जनालाई प्रहरीले पक्राउ गरेको छ । पक्राउ पर्नेहरुमा छिन्नमस्था गाउँपालिका-३ बस्ने २० वर्षीय मोहमद इसराइल, १९ वर्षीय करण यादव र बागलुङ कोढेखोला गाउँपालिका-३ बस्ने २१ वर्षीय निलसु मगर रहेका छन् । वडा प्रहरी कार्यालय सप्तरीबाट खटिएको प्रहरीले जाँच गर्ने क्रममा उनीहरुलाई उक्त लागूऔषध सहित फेला पारी पक्राउ गरेको हो । 
झापा मेची नगरपालिका-६ स्थित शिला पथ्थर होटलका संचालक ४८ वर्षीय लक्ष्मीप्रसाद भट्टराई र भारतको दार्जिलिङस्थित बतासी बस्ने ५५ वर्षीय खेमल मण्डललाई लागूऔषध खैरो हेरोइन १९ ग्राम ५ सय मिलिग्राम सहित शनिबार प्रहरीले पक्राउ गरेको छ । लागूऔषध नियन्त्रण व्युरो झापाबाट खटिएको प्रहरीले उक्त होटलको १ सय ६ नम्बरको कोठा जाँच गर्ने क्रममा उक्त लागूऔषध सहित फेला पारी उनीहरुलाई पक्राउ गरेको हो ।
नवलपरासी (पूर्व) मध्यबिन्दु नगरपालिका-७ फुलबारीबाट लम्जुङ बेशीसहर नगरपालिका-८ बस्ने २० वर्षीय सुब्बा गुरुङलाई नियन्त्रित लागूऔषध नोर्फिन ५१ एम्पुल, फेनारगन ६१ एम्पुल, डाईजापाम ५९ एम्पुल र १ वटा प्रयोग गरेको सिरिन्ज सहित आइतबार बिहान प्रहरीले पक्राउ गरेको छ । भैरहवाबाट काठमाडौंतर्फ आउँदै गरेको लु.२ ख २६६७ नम्बरको बस जाँच गर्ने क्रममा बसमा सवार गुरुङलाई उक्त लागूऔषध सहित फेला पारी पक्राउ गरेको हो ।
यस सम्बन्धमा स्थानीय प्रहरीले आवश्यक अनुसन्धान गरिरहेको छ ।

( नेपाल प्रहरी )