‘चेन स्मोकर’ फुटबल प्रशिक्षक, जो चुरोट चपाएर पनि खान्छन्

[[IMG_ALT]]

www.bsgnews | Sports | Ashwin 18

चुरोटका अम्मली धेरै हुन्छन् संसारमा । तर, इंग्लिस फुटबल क्लब चेल्सीका प्रशिक्षक माउरिजियो सारीजस्ता चाहिँ कमै होलान् । उनी चुरोटको धुवाँ मात्रै उडाउँदैनन्, उस्तै परे चपाएर समेत खाइदिन्छन् ।

सुन्दा अचम्म लाग्न सक्छ तर, सारीको चुरोट मोह साँच्चै अनौठो छ । चुरोटबिना उनको तस्वीर पाउनै मुस्किल छ ।उनी चेन स्मोकर नै हुन् । इटालियन क्लब नापोलीमा रहँदा खेल भइरहेका बेला पनि चुरोट पिउने छुट थियो । मैदानको बाहिरी लाइनमा बसेर धुँवा उडाइरहेका भेटिन्थे । अहिले प्रिमियर लिगमा भने त्यो छुट छैन ।

आफ्नो प्रशिक्षणको १९ औं क्लब चेल्सीमा रहेका सारीलाई यस्तो अप्ठ्यारो यसअघि थिएन । नापोलीअघि अर्को इटालियन क्लब इपोलीमा रहँदा पनि उनी उसैगरी मनमौजी धुँवा उडाइरहेका हुन्थे । पछि धेरै नै आलोचना हुन थालेपछि नापोलीले मैदानमै धुवाँ उडाउन प्रतिबन्ध लगायो । तर, सारीका लागि मैदान छेउमै चुरोट खाने एउटा विशेष स्थान नै छुट्याइदियो । त्यस्तो स्थान चेन्जिङमा रुममा पनि थियो । कतिसम्म भने टिम ‘अवे’ खेलका लागि प्लेनमा जाँदा उनी भने एक्लै रेल चढेर जान्थे । त्यसको एउटै कारण थियो बीच–बीचमा चुरोट खान पाइने लोभ ।

उनले दिनमा पाँच बट्टासम्म चुरोट सिध्याउने गरेको उनको नजिकै रहेर काम गरेकाहरु सुनाउँछन् । ‘सारी चुरोटमा असाध्यै डुब्छन् । त्यो एकदमै अविश्वसनीय छ’ नापोलीका कप्तान मरेक ह्यामसिक भन्छन्, ‘त्यस्तो धेरै चुरोट खाने मैले अरु कोही देखेको छैन । तर, त्यस्तरी चुरोटमा डुबेर पनि उनको सोच खेलभन्दा बाहिर कहिल्यै गएन ।’

सारी र चुरोटका सम्बन्धमा एउटा रोचक घटना छ । इटालियन र्‍यापर नास्टाले ‘जस्ट लाइक पाउरिजियो सारी’ बोलमा एउटा गीत नै बनाए । जुन गाएर उनले सारीसँगको भेट पक्का गरे । नास्टाले सारीसँगको भेटमा तस्वीर खिचाए र एउटा चुरोटको खिल्लीमा अटोग्राफ समेत लिए । उनी भन्छन्, ‘म्यारोडोनालाई भेट्दा फुटबलमा अटोग्राफ लिए जस्तै हो सारीसँग चुरोटमा लिनु ।’

चेल्सीले सारीलाई क्लबमा ल्याउने कुरा चलेसँगै उनका लागि नापोलीमा जस्तै चुरोट खान मिल्ने ठाउँ बनाइदिने बहस पनि चलेको थियो । जसमा क्लब सकारात्मक रहेको खबरहरु बाहिरिरहेका थिए । तर, पछि कुरा उठ्यो ‘ब्रिटिश एटिच्युड’ को ।

सारीको सम्बन्धमा बेलायती मनोवृत्तिको कुरा चेल्सीका मालिक रोमन एब्रामोभिचले नै उठाएका थिए । सारीले बेलायती मनोवृत्तिलाई स्वीकार गर्नुपर्ने उनले सार्वजनिक रुपमा नै बताएका थिए । मैदानमा चुरोट खाने बानी छाड्न मात्रै होइन, कोट लगाएर आउन पनि एब्रामोभिचको सुझाव थियो । सामान्यतः मैदानमा टिसर्ट टाउजरमा देखिने सारीले अहिलेसम्म कोट पनि लगाइसकेका छैनन् र चुरोट पनि छाडेका छैनन् ।

प्रिमियर लिगमा मैदान छेउ चुरोट खान लागेको प्रतिबन्धलाई उनले आफ्नै तरिकाले जवाफ दिए। चुरोट सल्काएर होइन, चपाएर खाइदिए। प्रिमियर लिगमा हडर्सफिल्डसँगको खेलको दौरान निकोटिनको साह्रै तलतल आएर होला, सारीले चुरोटको फिल्टरपपट्टीको भाग चुइगम चपाए जस्तो चपाइरहेका थिए। चुरोट खाँदा पनि धेरैजस्तो फिल्टरसम्म नै खाने उनले त्यसको लत मेट्न फिल्टर चपाइरहेको फोटो भाइरल नै बनेको थियो ।

चेल्सीमा सारीको अर्को तस्वीर पनि भाइरल बनेको थियो । प्रिमियर लिगको दोस्रो खेलमा चेल्सीले आर्सनलविरुद्ध गोल गर्दाको खुसी मनाइरहेका बेला सारीको हातमा चुरोटको बट्टा थियो। चेल्सीले पहिलो हाफमा दुई गोल गरेपछि पहिलो हाफमा नै आर्सनलले दुई गोल फर्काएको थियो । खेल निकै रोचक भइरहँदा प्रशिक्षक सारीलाई केही समय निकोटिनको तलतलले अत्यायो । ‘पहिलो हाफको अन्तिम १५ मिनेट त निकै तनावपूर्ण थियो । बाँकी ७५ मिनेट मैले खेल निकै रमाइलो मानें । तर, त्यो १५ मिनेटमा मैले चुरोट खान पाएको भए निकै राम्रो हुने थियो’ खेलपछि सारीले भनेका थिए ।

‘म बेलुका मात्रै चुरोट खाने प्रयासमा छु । त्यो नसके पनि खेलको बेला नखान धेरै मेहनत गरिरहेको छु । कम्तिमा दुई वर्ष नखान सक्छु भन्ने लागेको छ’ उनले भनेका छन्। यसका लागि उनले आफ्ना बुबामार्फत प्रेरणा पनि पाएका छन्। यदि कसैले सारीको चुरोट खाने बानीमा नियन्त्रण गर्न सक्छ भने त्यो उनको बुबा नै हो। चेल्सीबाट बोलावट आएपछि जान सुझाव दिएका उनका बुबाले नै चुरोट कम गर्न सल्लाह पनि दिएका थिए ।

‘जब चेल्सीबाट मलाई लैजान खोजेको खबर बुबाले थाहा पाउनुभयो, उहाँले जाने सल्लाह दिनुभयो । साथै कम्तिमा चेल्सीमा दुई वर्ष चुरोट नखान पनि सल्लाह दिनुभएको थियो’ सारीले डेलीमेललाई भनेका छन् । यो सबैले सारीको मोह फुटबलमा भन्दा चुरोटमा बढी छ भन्ने लाग्ला । तर, कुरो त्यस्तो होइन । सारी फुटबलमा सिद्धान्त र मनोरञ्जनलाई एकसाथ लैजान्छन् । उनी भन्छन्, ‘तपाइँले खेललाई रमाइलो साथ अघि बढाउनु भयो भने मेहनत कम गर्दा पनि राम्रो नतिजा देखिन्छ ।’