काठमाडौं, भदौ ६ — युवालाई खेलकुदसँग जोड्दै स्वस्थ, अनुशासित र सक्रिय जीवनशैली प्रवर्द्धन गर्ने उद्देश्यले बुढानीलकण्ठ नगरपालिका वडा नं. ३ ले शनिबार रोड रेस रनिङ कार्यक्रम आयोजना गरेको छ।

विभिन्न उमेर समूहका धावकहरूको सहभागिता रहेको कार्यक्रममा सहभागीहरूले उत्साहपूर्वक दौडमा भाग लिएका थिए। प्रतियोगिताले खेलकुदप्रतिको रुचि बढाउनुका साथै शारीरिक स्वास्थ्य, अनुशासन, आत्मविश्वास र सक्रिय जीवनशैलीको सन्देश दिएको आयोजकले जनाएको छ।

वडा नं. ३ ले पछिल्लो समय रोड रेस, ट्रेल रेसलगायतका खेलकुद गतिविधिलाई प्राथमिकता दिँदै आएको छ। यस्ता कार्यक्रममार्फत स्थानीय युवालाई खेलकुदमा सक्रिय बनाउनुसँगै बुढानीलकण्ठ क्षेत्रको प्राकृतिक सौन्दर्य, पदमार्ग तथा पर्यटन सम्भावनालाई समेत उजागर गर्ने प्रयास भइरहेको वडा कार्यालयको भनाइ छ।

खेलकुदलाई केवल प्रतिस्पर्धाका रूपमा नभई स्वस्थ नागरिक, सक्रिय युवा र सशक्त समुदाय निर्माणको आधारका रूपमा विकास गर्ने लक्ष्य वडा कार्यालयले अघि सारेको छ। आगामी दिनमा पनि समुदायको सहभागितामा नियमित खेलकुद तथा स्वास्थ्य प्रवर्द्धनसम्बन्धी कार्यक्रम सञ्चालन गर्ने उद्देश्य रहेको जनाइएको छ।