काठमाडौँ — अमेरिकामा रहेका नेपाली नागरिकको करोडौँ मूल्यको जग्गा किर्ते कागजात खडा गरी बिक्री गर्न खोज्ने एक संगठित गिरोहलाई प्रहरीको केन्द्रीय अनुसन्धान ब्यूरो (सीआईबी) ले पक्राउ गरेको छ। सीआईबीको विशेष अपरेसन अन्तर्गत काठमाडौँ महानगरपालिका–१३ का वडाध्यक्ष ध्रुवनारायण मानन्धर र कलंकी मालपोत कार्यालयका अधिकृत टीकाबहादुर कुँवरसहितको टोली पक्राउ परेको हो। पक्राउ पर्नेमा मालपोतका अन्य कर्मचारी, लेखापढी व्यवसायी (कानुनी सहजकर्ता) र जग्गा दलालहरू समेत रहेका छन्।

 ८ करोडको जग्गा हडप्ने दाउ अनुसन्धानका अनुसार, अमेरिकामा कार्यरत सुमित अडुकियाको काठमाडौँ महानगरपालिका वडा नं. १३, कालिमाटीस्थित १ रोपनी १३ आना जग्गालाई निजको अनुपस्थितिमा अनाधिकृत रूपमा कब्जा गर्ने नियत राखिएको थियो। गिरोहले जग्गाधनी विदेशमा रहेको मौका छोपी नक्कली राष्ट्रिय परिचयपत्र, नागरिकता र जग्गासम्बन्धी नक्कली सरकारी श्रेस्ता (कागजातहरू) तयार पारेको सीआईबीले जनाएको छ। उक्त बहुमूल्य जग्गालाई ८ करोड रुपैयाँमा तेस्रो पक्षलाई बिक्री गर्ने अन्तिम तयारी भइरहेको अवस्थामा प्रहरीले छापा मारेको थियो। जनप्रतिनिधि र कर्मचारीकै प्रत्यक्ष मिलेमतो यस भू-माफिया काण्डमा सरकारी संयन्त्र र स्थानीय जनप्रतिनिधिको प्रत्यक्ष संलग्नता देखिएको छ:  नक्कली पहिचान प्रमाणित: काठमाडौँ-१३ का वडाध्यक्ष ध्रुवनारायण मानन्धरले किर्ते परिचयपत्रका आधारमा जग्गाधनीको कागजात प्रमाणित गरिदिएको आरोप छ।

मालपोतबाटै सेटिङ: कलंकी मालपोत कार्यालयका अधिकृत टीकाबहादुर कुँवर र अन्य कर्मचारीहरूले सरकारी ढड्डा र श्रेस्तामा किर्ते कागजातलाई वैधता दिने प्रक्रिया अगाडि बढाएका थिए। प्रहरी कारबाही र थप अनुसन्धान जग्गाधनी नेपालमा नभएको अवस्थामा सरकारी अधिकारीहरूकै मिलेमतोमा सम्पत्ति हडप्ने ठूलो प्रवृत्तिको पर्दाफास भएको प्रहरीको भनाइ छ। सीआईबीले पक्राउ परेका सबैमाथि सरकारी कागजात किर्ते, संगठित अपराध र ठगी मुद्दा अन्तर्गत कानुनी प्रक्रिया अगाडि बढाएको छ। यस गिरोहमा संलग्न अन्य फरार व्यक्तिहरूको खोजी कार्य तीव्र पारिएको ब्यूरोले जनाएको छ।