काठमाडौँ । बुढानीलकण्ठ नगरपालिकामा महिलाहरूको प्रजनन स्वास्थ्यलाई मध्यनजर गर्दै आयोजित दुई दिने निःशुल्क एकीकृत महिला स्वास्थ्य शिविर सफलतापूर्वक सम्पन्न भएको छ। नगरपालिकाको जनस्वास्थ्य महाशाखाको आयोजना तथा नेपाल परिवार नियोजन संघ, काठमाडौँको प्राविधिक सहयोगमा फागुन ४ र ५ गते वडा नं. ३ स्थित बुढानीलकण्ठ स्वास्थ्य चौकी, घुम्तीमा शिविर सञ्चालन गरिएको थियो।

शिविरमा उपलब्ध सेवाहरू

बिहान १०:३० देखि बेलुका ४:०० बजेसम्म चलेको शिविरमा महिलाहरूका विभिन्न जटिल स्वास्थ्य समस्याहरूको परीक्षण र परामर्श प्रदान गरिएको थियो:

• पाठेघरको मुखको क्यान्सर परीक्षण (VIA Test)

• आङ खस्ने समस्या (पेल्भिक अर्गन प्रोलाप्स) को जाँच

• अब्स्टेट्रिक फिस्टुला र बाँझोपन सम्बन्धी परामर्श

• अन्य एकीकृत प्रजनन स्वास्थ्य सेवाहरू

सहभागिता र उपलब्धि

जनस्वास्थ्य महाशाखाका अनुसार दुई दिनको अवधिमा कुल २७० जना महिलाले स्वास्थ्य सेवा लिएका छन्। शिविरको पहिलो दिन १०५ जनाले VIA परीक्षण गराएका थिए भने दोस्रो दिन १५० जना भन्दा बढी महिलाले विभिन्न स्वास्थ्य परीक्षण र परामर्श सेवा प्राप्त गरेका थिए।

प्रमुख व्यक्तित्वहरूको उपस्थिति

कार्यक्रममा नगरपालिकाका उप-प्रमुख अनिता लामा, वडा नं. ३ का वडा अध्यक्ष आकाश धिताल, प्रमुख प्रशासकीय अधिकृत अजय बर्तौला, वडा सदस्य बालमाया श्रेष्ठ र जनस्वास्थ्य महाशाखाका कुमार प्रसाद दहाल लगायतको उपस्थिति रहेको थियो।

कार्यक्रमको समन्वय स्वास्थ्य चौकी (HP) इन्चार्ज एल.डी. भुसालले गर्नुभएको थियो भने सम्पर्क व्यक्तिको रूपमा समझ्ना कुवँर खटिनुभएको थियो। शिविरमा नेपाल परिवार नियोजन संघका प्रसूति तथा स्त्रीरोग विशेषज्ञ, नर्सिङ अधिकृत र प्राविधिक टोलीले सेवा प्रदान गरेका थिए।

नगरपालिकाले स्थानीयस्तरमै विशेषज्ञ सेवा उपलब्ध गराएपछि सेवाग्राही महिलाहरूले खुसी व्यक्त गरेका छन्। यस्ता कार्यक्रमले महिलाहरूमा लुकेर रहेका स्वास्थ्य समस्या पहिचान गर्न र समयमै उपचार पाउन ठुलो मद्दत पुग्ने विश्वास लिइएको छ।